जब तै 370 और 35A हटाई स, इमरान की साँस उखड़ आई स:डॉ सुलक्षणा

जब तै 370 और 35A हटाई स
इमरान की साँस उखड़ आई स

भाज्या भाज्या हांडे स वो बेचारा
ना भरपेट उसनै रोटी खाई स

सब तै पहल्यां गया वो चीन धोरै
बोल्या तेरे आगै झोली फैलाई स

किमैं मेरा जुगाड़ करवा दे जिनपिंग
मुसबीत म्ह आज तेरा इमरान भाई स

जिनपिंग बोल्या तन्नै के बताऊँ इमरान
इस मोदी नै धड़कन मेरी बी बढ़ाई स

मैं कोय पंगे कोणी लेऊँ इस मामले म्ह
थारी तै दोनुआं की रोज की लड़ाई स

फेर इमरान भाज्या भाज्या गया ट्रम्प धोरै
बोल्या देख्या मोदी ने 370 तोड़ बगाई स

ट्रम्प बोल्या सुन र तेरे चक्कराँ म्ह ना आऊँ
मैं ना कहूँ कुछ, मोदी ने दोस्ती निभाई स

पहल्यां आतंकवाद नै बंद करकै दिखा दे
तेरे ताहिं हजार ब मन्नै याहे समझाई स

चौगरदे कै हाथ फैला कै देखै कुछ ना मिला
इसी मोदी जी नै रणनीति आपणी बनाई स

फेर पहुंचा वो बहलम्बे म्ह "सुलक्षणा" धोरै
बोल्या बेबे तेरे तै मन्नै बड़ी आस लगाई स

मोदी नै मना दे बेबे, इज्जत मेरी बचा ले
मन्नै बेरा स वो रोज पढ़े तेरी कविताई स

मैं बोली मेरी मान तू पीओके नै भुलज्या
जिंदा रह ज्यागा भाई इसै म्ह तेरी भलाई स

मान ज्या गादड़ आली मौत मारा जावैगा
मोदी आगै चालै ना किसै की चतुराई स

इमरान बोल्या "सुलक्षणा" समझग्या मैं
कुछ करूंगा तो चढ़नी मेरी करड़ाई स

डॉ सुलक्षणा

Post a Comment

0 Comments